Cabinet of Samdech Kittipritthbindit - ខុទ្ទកាល័យ សម្តេចកិត្តិព្រឹទ្ធបណ្ឌិត

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក្រាបបង្គំទូលថ្វាយសារលិខិតថ្វាយព្រះពរ សម្តេចព្រះមហាក្សត្រី ព្រះវររាជមាតាជាតិខ្មែរ ព្រះប្រធានកិត្តិយស កាកបាទក្រហមកម្ពុជា ក្នុងវរោកាសដ៏មហានក្ខត្តឫក្សឧត្តុង្គឧត្តម នៃព្រះរាជពិធីបុណ្យចម្រើនព្រះជន្មព្រះវស្សា គម្រប់៩០ យាងចូ​ល ៩១ព្រះវស្សា ។

(ភ្នំពេញ)៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅថ្ងៃទី១៥ ខែមិថុនា ឆ្នាំ២០២៦ បានក្រាបបង្គំទូលថ្វាយសារលិខិតថ្វាយព្រះពរ សម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត ក្នុងវរោកាសដ៏មហានក្ខត្តឫក្សឧត្តុង្គឧត្តម នៃព្រះរាជពិធីបុណ្យចម្រើនព្រះជន្មព្រះវស្សា គម្រប់៩០ យាងចូ​ល ៩១ព្រះវស្សា នៅថ្ងៃទី១៨ ខែមិថុនា ឆ្នាំ២០២៦ នាពេលខាងមុខ ដែលសារលិខិតមានខ្លឹមសារទាំងស្រុងថា «ខ្ញុំម្ចាស់ និងសមាជិក សមាជិកានៃគណៈ​កម្មាធិ​កា​រ​កណ្តាលព្រមទាំងមន្ត្រី បុគ្គលិក អ្នកស្ម័គ្រចិត្ត និងយុវជន នៃកាកបាទក្រហមកម្ពុជា​នៅទូទាំង​ប្រទេស សូមព្រះបរ​ម​រា​ជានុញ្ញាតក្រាបបង្គំថ្វាយនូវព្រះរាជសព្ទសាធុការពរជ័យ បវរសួស្តី សិរីមង្គល វិបុលសុខ មហា​ប្រសើរ​គ្រប់ប្រការ ថ្វាយ សម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈ​ដ៏​ខ្ពង់​ខ្ព​ស់​បំផុត សូមព្រះអង្គមានព្រះរាជសុខភាពល្អពេញបរិបូរណ៍ ព្រះកាយពលមាំមួន ព្រះបញ្ញាញា​ណ​ភ្លឺថ្លា និងមា​ន​ព្រះជន្មាទីឃាយុយឺនយូរជាងរយព្រះវស្សា ជាភិយ្យោភាពតរៀងទៅ។

ក្នុងព្រះរាជពិធីចម្រើនព្រះជន្មវឌ្ឍនមង្គលដ៏វិសេសវិសាលនេះ ខ្ញុំម្ចាស់ ទូលព្រះបង្គំយើងខ្ញុំទាំងអស់គ្នាសូមព្រះបរមរាជានុញ្ញាតលំឱនកាយសម្តែងនូវព្រះរាជកតញ្ញូ កតវេទិតាធម៌ដ៏ជ្រាលជ្រៅបំផុត ចំពោះព្រះមហា​ក​រុណាទិគុណ និងព្រះព្រហ្មវិហារធម៌ដ៏ឧត្តុង្គឧត្តម របស់ សម្តេចព្រះមហាក្សត្រី ព្រះវររាជមាតាជាតិខ្មែរ ជា​ទី​​​គោរពសក្ការៈដ៏ខ្ពង់ខ្ពស់បំផុត ដែលជានិច្ចកាលព្រះអង្គតែងតែប្រកបដោយទសពិធរាជ​ធម៌ គុណធ​ម៌ មនុស្សធម៌ដ៏ថ្លៃថ្លា ​និងគង់ប្រថាប់ជានិមិត្តរូបដ៏ពិសិដ្ឋក្នុងការគោរព​ប្រតិបត្តិតាមមាគ៌ា​ដ៏​ល្អ​ផូរ​ផ​ង់​​របស់​ព្រះពុទ្ធ​​​​​​សាស​នា ដើម្បីសន្សំព្រះរាជបុញ្ញកុសលនាំមកនូវសេចក្តីសុខ សេចក្តីចម្រើន ​សុភម​ង្គ​ល និងភា​ព​សម្បូរ​សប្បា​យ រុងរឿ​ង ថ្កុំថ្កើង តម្កល់ជាឧត្តម​ប្រយោជន៍​ដ៏មហាធំធេងសម្រាប់សង្គម​ជា​តិ​​ និង​ប្រជារាស្ត្រ​កម្ពុជា ជាកូន ចៅ ចៅ​ទួត​របស់ព្រះអង្គ​ដ៏​យូរអង្វែង​តរៀង​ទៅ​។

ក្នុងឱកាសដ៏មហាសិរីមង្គលប្រពៃថ្លៃថ្លានេះ ខ្ញុំម្ចាស់ ទូលព្រះបង្គំយើងខ្ញុំទាំងអស់គ្នា សូមលំឱនកាយលើកហត្ថប្រណម្យបួងសួងដល់គុណព្រះរតនត្រ័យ តេជះព្រះបារមីនៃវត្ថុស័ក្តិសិទ្ធិទាំងឡាយក្នុងលោក ដួង​ព្រះ​វិញ្ញាណក្ខន្ធអតីតព្រះមហាក្សត្រ ព្រះមហាក្សត្រិយានីខ្មែរគ្រប់ព្រះអង្គ និងដួងព្រះវិញ្ញាណក្ខន្ធ ព្រះករុណា ព្រះបរម​រតន​កោ​ដ្ឋ ទេវតាថែរក្សាព្រះមហាស្វេតច្ឆត្រ ជាពិសេស ទេវតាឆ្នាំថ្មីព្រះនាង រាក្យសាទេវី សូម​​ព្រះ​មេត្តា​ជួយអភិបាលប្រោសព្រំ គ្រងរក្សា សម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរ​ព​សក្ការៈ​ដ៏ខ្ពង់ខ្ពស់បំផុត សូមព្រះអង្គព្រះប្រកបដោយព្រះបរមសុខគ្រប់ប្រការ កុំបីឃ្លៀងឃ្លាតឡើយ៕»

ខាងក្រោមនេះ ជាសារលិខិតរបស់សម្តេចកិត្តិព្រឹទ្ធបណ្ឌិត ក្រាបបង្គំទូលថ្វាយសម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត៖

សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចាត់តំណាងនាំយកទេយ្យវត្ថុ និងបច្ច័យមួយចំនួនធំ ទៅថ្វាយប្រគេន សម្ដេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត នន្ទ ង៉ែត …!!

ក្នុងនាមជាកុលធីតាខ្មែរមួយរូប ដែលតែងតែប្រកាន់យ៉ាងខ្ជាប់ខ្ជួននូវទំនៀមទម្លាប់ប្រពៃណីជាតិ និងព្រះពុទ្ធសាសនា ជាពិសេសការគិតគូរជាប្រចាំអំពីសុខុមាលភាព និងព្រះរាជសុខភាពរបស់ សម្ដេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត នន្ទ ង៉ែត សម្តេចព្រះមហាសង្ឃរាជ នៃព្រះរាជាណាចក្រកម្ពុជា នៅព្រឹកថ្ងៃទី១៤ ខែមិថុនា ឆ្នាំ២០២៦នេះ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ឧត្តមភរិយាសម្តេចអគ្គមហាសេនាបតីតេជោ ហ៊ុន សែន និងជាប្រធានកាកបាទក្រហមកម្ពុជា បានចាត់ឱ្យលោកជំទាវបណ្ឌិត អ៊ុក ម៉ាលី សមាជិកាព្រឹទ្ធសភា និងជាអគ្គហេរញ្ញិកកាកបាទក្រហមកម្ពុជា នាំយកនូវទេយ្យវត្ថុ និងបច្ច័យមួយចំនួនធំ ថ្វាយប្រគេនផ្ទាល់ចំពោះសម្ដេចជាអម្ចាស់ ដែលបច្ចុប្បន្នព្រះអង្គកំពុងគង់នៅក្នុងវត្តបទុមវត្តីរាជវរារាម រាជធានីភ្នំពេញ។

សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តែងតែគិតគូរជាប់ជាប្រចាំមិនដែលខកខានឡើយ អំពីសុខទុក្ខ និងព្រះរាជសុខុមាលភាពរបស់សម្ដេចព្រះសង្ឃ ក៏ដូចជាព្រះថេរានុត្ថេរៈគ្រប់ព្រះអង្គ បើទោះបីជា សម្ដេចកិត្តិព្រឹទ្ធបណ្ឌិត មិនបានអញ្ជើញមកក្រាបបង្គំគាល់ដោយផ្ទាល់យ៉ាងណាក្ដី ក៏សម្ដេចតែងតែចាត់តំណាងដ៏ខ្ពង់ខ្ពស់ ឱ្យនាំយកនូវទេយ្យវត្ថុ គ្រឿងឧបភោគបរិភោគ និងបច្ច័យ មកដង្ហែថ្វាយប្រគេនជាប្រចាំមិនដែលអាក់ខានឡើយ។

ទន្ទឹមនឹងនេះ តាមរយៈលោកជំទាវបណ្ឌិត អ៊ុក ម៉ាលី, សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក៏បានលំឱនកាយក្រាបបង្គំទូលថ្វាយព្រះរាជសព្ទសាធុការពរជ័យចំពោះ សម្ដេចព្រះមហាសង្ឃរាជ ជាអម្ចាស់ សូមព្រះអង្គមានព្រះរាជសុខភាពល្អបរិបូរណ៍ ព្រះកាយពលមាំមួនខ្លាំងក្លា និងព្រះជន្មាយុយឺនយូរ ដើម្បីបន្តគង់ប្រថាប់ជាម្លប់ដ៏ត្រជាក់ត្រជំ ទ្រទ្រង់ដល់វិស័យព្រះពុទ្ធសាសនានៅក្នុងព្រះរាជាណាចក្រកម្ពុជា ឱ្យបានយូរអង្វែងតទៅ។

ដោយអំណាចនៃមហាកុសលផលបុណ្យនាថ្ងៃនេះដែរ សម្ដេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត នន្ទ ង៉ែត សម្តេចព្រះមហាសង្ឃរាជ នៃព្រះរាជាណាចក្រកម្ពុជា បានប្រោសប្រទាននូវសព្ទសាធុការពរជ័យ សិរីសួស្តី ជ័យមង្គល វិបុលសុខគ្រប់ប្រការ ជូនចំពោះ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសម្ដេចតេជោ ហ៊ុន សែន ព្រមទាំង សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត សូមជួបប្រទះតែនឹងសេចក្ដីសុខ សេចក្ដីចម្រើន ឈ្នះអស់មារសត្រូវគ្រប់ទិសទី ដើម្បីបន្តដឹកនាំ និងអភិវឌ្ឍន៍ប្រទេសជាតិកម្ពុជា ឱ្យកាន់តែមានការរីកចម្រើនរុងរឿង ខ្លាំងក្លាជានិរន្តរ៍តទៅមុខទៀត។

សូមជម្រាបជូនថា ទេយ្យទានជាសទ្ធាជ្រះថ្លារបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ថ្វាយប្រគេនចំពោះ សម្ដេចព្រះមហាសង្ឃរាជ ជាអម្ចាស់ រួមមាន៖ អង្ករ, ផ្លែឈើស្រស់, ទឹកដោះគោ Ensure, ទឹកដោះគោស្រស់, ទឹកត្រចៀកកាំ, ទឹកប្រទាលកន្ទុយក្រពើ, ទឹកបរិសុទ្ធ, និងថវិកាមួយចំនួនធំ។ ដោយឡែក លោកជំទាវបណ្ឌិត អ៊ុក ម៉ាលី និងឯកឧត្តមបណ្ឌិតសភាចារ្យ ម៉ា ឈឿន ក៏មានសទ្ធាជ្រះថ្លាថ្វាយប្រគេននូវថវិកាផ្ទាល់ខ្លួនមួយចំនួនផងដែរ៕

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញទទួលថវិកាចំនួន ១.០០៩.៩៩៩ ដុល្លារអាម៉េរិក ពីថ្នាក់ដឹកនាំ និងសមាជិកសមាជិកានៃសមាគមឧកញ៉ាកម្ពុជា ដែលឧបត្ថម្ភជូនកាកបាទក្រហមកម្ពុជា ដើម្បីអបអរទិវា ៨ ឧសភា ២០២៦ ក្រោមមូលបទ «បន្តរួមកម្លាំងគ្នា ដើម្បីមនុស្សធម៌» ...!!

កាកបាទក្រហមកម្ពុជា ក្រោមម្លប់គង់ប្រថាប់ដ៏ឧត្តុង្គឧត្តមនៃ សម្តេចព្រះមហាក្សត្រី ព្រះវររាជមាតាជាតិខ្មែរ ជាព្រះប្រធានកិត្តិយស និងមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានទទួលថវិកាចំនួន ១.០០៩.៩៩៩ ដុល្លារអាម៉េរិក (មួយលានប្រាំបួនពាន់ប្រាំបួនរយកៅសិបប្រាំបួនដុល្លារអាម៉េរិក) ពីសមាគមឧកញ៉ាកម្ពុជា ក្នុងឱកាសខួបទី១៦៣ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២៦ ក្រោមមូលបទ «បន្តរួមកម្លាំងគ្នា ដើម្បីមនុស្សធម៌»។

ពិធីនេះប្រព្រឹត្តទៅនៅទីស្នាក់ការកណ្តាលកាកបាទក្រហមកម្ពុជា នៅរសៀលថ្ងៃទី១៣ ខែមិថុនា ឆ្នាំ២០២៦នេះ ក្រោមអធិបតីភាពលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អនុប្រធានអចិន្ត្រៃយ៍កាកបាទក្រហមកម្ពុជា តំណាងដ៏ខ្ពង់ខ្ពស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងមានវត្តមានអញ្ជើញចូលរួមពី លោកអ្នកឧកញ៉ា អ្នកឧកញ៉ា និងឧកញ៉ា ដែលដឹកនាំដោយលោកអ្នកឧកញ៉ា លាង ឃុន អនុប្រធានសមាគមឧកញ៉ាកម្ពុជា តំណាងដ៏ខ្ពង់ខ្ពស់ លោកអ្នកឧកញ៉ា លី យ៉ុងផាត់ ប្រធានសមាគមឧកញ៉ាកម្ពុជា។

សូមជម្រាបជូនថា ជារៀងរាល់ឆ្នាំ សមាគមឧកញ៉ាកម្ពុជា តែងតែអំពាវនាវដល់សមាជិកទាំងអស់ ឱ្យចូលរួមបរិច្ចាគថវិកាជូនកាកបាទក្រហមកម្ពុជា តាមរយៈសមាគមឧកញ៉ាកម្ពុជា ទៅតាមលទ្ធភាព និងសទ្ធាជ្រះថ្លា រៀងៗខ្លួន។ ជាក់ស្តែងនៅឆ្នាំ២០២៦នេះ មានសមាជិកចំនួន ៧៩រូប បានបរិច្ចាគថវិកាសរុបចំនួន ១.០០៩.៩៩៩ដុល្លារ ក្នុងនោះថវិកាផ្ទាល់របស់សមាគមឧកញ៉ាកម្ពុជាមានចំនួន ១១៧.៦១២ដុល្លារ។ ដោយឡែក ចាប់តាំងពីឆ្នាំ២០២៣ មកដល់ឆ្នាំ២០២៦, នេះគឺជាលើកទី៥ហើយ ដែលសមាគមឧកញ៉ាកម្ពុជា បាននាំយកថវិកាមកប្រគល់ជូនកាកបាទក្រហមកម្ពុជា ដែលមានសមាជិកជាង ៤៣០រូប បានបរិច្ចាគ ស្មើនឹងថវិកាសរុបចំនួន ៦.៤៦០.២២០ដុល្លារ ក្នុងនោះថវិការបស់សមាគមផ្ទាល់ចំនួន ៣៥០.៨០២ដុល្លារ។

«ថវិកាដែលសប្បុរសជនបានបរិច្ចាគនេះ នឹងក្លាយទៅជាអង្ករ ម្ហូបអាហារ ទឹកស្អាត ថ្នាំពេទ្យ និងសម្ភារៈចាំបាច់ ឬជំនួយបន្ទាន់មួយកញ្ចប់សម្រាប់ជួយដល់គ្រួសារមួយដែលកំពុងជួបការលំបាក។ លើសពីនេះទៅទៀត វាក៏ក្លាយទៅជាកម្លាំងចិត្តមួយសម្រាប់ម្តាយម្នាក់ ដែលកំពុងបារម្ភពីកូនៗ ជាក្តីសង្ឃឹមមួយសម្រាប់គ្រួសារភៀសសឹក ជាការលួងលោម និងលើកទឹកចិត្ត សម្រាប់គ្រួសារយុទ្ធជនពលី ឬយុទ្ធជនរងរបួស និងជាសារដ៏កក់ក្ដៅមួយ ប្រាប់ពួកគាត់ថា ពួកគាត់ មិនត្រូវបានបំភ្លេចចោលឡើយ។ សប្បុរសជនមិនមែនជាអ្នកដែលនៅឆ្ងាយពីប្រតិបត្តិការមនុស្សធម៌ទេ។ សប្បុរសជនគឺជាផ្នែកមួយនៃបេសកកម្មមនុស្សធម៌នេះ ហើយជាកម្លាំងពិតនៅពីក្រោយជំនួយ ដែលទៅដល់ដៃអ្នករងគ្រោះ។»

តំណាងកាកបាទក្រហមកម្ពុជា ចូលរួមសន្និសីទសារព័ត៌មានស្តីអំពីជោគជ័យរបស់ព្រះរាជាណាចក្រកម្ពុជា ជាប្រទេសដំបូងគេនៅតំបន់អាស៊ី-បាស៊ីហ្វិក ដែលបានសម្រេចគោលដៅសកល ៩៥-៩៥-៩៥…!!

(ភ្នំពេញ)៖ នៅរសៀលថ្ងៃសុក្រទី១២ ខែមិថុនា ឆ្នាំ២០២៦នេះ លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា និងជាអនុប្រធានក្រុមការងារឥស្សរជនឆ្នើមថ្នាក់ជាតិ អញ្ជើញចូលរួមជាវាគ្មិន ក្នុងសន្និសីទសារព័ត៌មានស្តីអំពី ជោគជ័យរបស់ព្រះរាជាណាចក្រកម្ពុជា ជាប្រទេសដំបូងគេនៅតំបន់អាស៊ី-បាស៊ីហ្វិក ដែលបានសម្រេចគោលដៅសកល ៩៥-៩៥-៩៥ ក្នុងការព្យបាលមេរោគអេដស៍ ក្រោមអធិបតីភាព ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ និងដោយមានការចូលរួមពី លោក Eamonn Murphy នាយកប្រចាំតំបន់អាស៊ី-ប៉ាស៊ីហ្វិក, អឺរ៉ុបខាងកើត, និងអាស៊ីកណ្តាល នៃកម្មវិធីសហប្រជាជាតិ រួមគ្នាស្តីពីមេរោគ អេដស៍ /ជំងឺ អេដស៍ (UNAIDS) ព្រមទាំងភាគីពាក់ព័ន្ធ និងអ្នកសារព័ត៌មានជាច្រើនរូប ដែលពិធីនេះរៀបចំឡើងនៅទីស្តីការគណៈរដ្ឋមន្ត្រី វិមានមិត្តភាព។

សូមបញ្ជាក់ថា សន្និសីទព័ត៌មាននេះធ្វើឡើងបន្ទាប់ពី UNAIDS ទទួលស្គាល់កម្ពុជា គឺជាប្រទេសទី៨ចំណោមប្រទេសទាំងអស់ក្នុងពិភពលោក និងជាប្រទេសទីមួយនៅក្នុងតំបន់អាស៊ី-ប៉ាស៊ីហ្វិក ដែលអាចសម្រេចបានគោលដៅសកលមេរោគអេដស៍ ៩៥-៩៥-៩៥ យ៉ាងត្រចះត្រចង់ និងបានលើកទឹកចិត្តឱ្យកម្ពុជាចែករំលែកបទពិសោធន៍ជោគជ័យ ទៅកាន់បណ្ដាប្រទេសក្នុងពិភពលោក ។

នៅក្នុងសន្និសីទព័ត៌មាននេះ លោកជំទាវ ពុំ ចន្ទីនី មានប្រសាសន៍ថា ក្នុងនាមកាកបាទក្រហមកម្ពុជា ក្រោមការដឹកនាំដ៏ខ្ពង់ខ្ពស់របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានបង្កើតឱ្យមានកម្មវិធីអេដស៍ តាំងពីពាក់កណ្តាលឆ្នាំ១៩៩៥ ដោយចាប់ផ្តើមការអប់រំផ្សព្វផ្សាយលើកកម្ពស់ការយល់ដឹងអំពីមេរោគអេដស៍/ជំងឺអេដស៍ បំណិន ជីវិត និងការផ្លាស់ប្តូរការប្រព្រឹត្ត ក្នុងចំណោមស្រទាប់ប្រជាជននៅក្នុងសហគមន៍ កងកម្លាំងប្រដាប់អាវុធគ្រប់ប្រភេទ យុវជន បុគ្គលិកបម្រើការនៅកាស៊ីណូ កម្មករ-កម្មការិនីរោងចក្រ ជនបម្លាស់ទី ព្រមទាំងបានជួយឧបត្ថម្ភគាំទ្រទាំងស្មារតីសម្ភារៈ និងស្បៀងអាហារដល់គ្រួសាររងគ្រោះដោយសារមេរោគអេដស៍ និងជាពិសេសកុមាររងគ្រោះដោយសារអេដស៍ ក្នុង១១ខេត្ត /ក្រុងនៃព្រះរាជាណាចក្រកម្ពុជា។ ចាប់តាំងពីឆ្នាំ២០០៦ បន្ទាប់ពី សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានទទួលគោរមងារពីអង្គការសហប្រជាជាតិ ជា “ឥស្សរជនឆ្នើមថ្នាក់ជាតិនៃវេទិកាភាពជាអ្នកដឹកនាំតំបន់អាស៊ី-ប៉ាស៊ីហ្វិកឆ្លើយតបមេរោគអេដស៍ ជំងឺអេដស៍ និងការអភិវឌ្ឍនៅកម្ពុជា”សម្ដេច បានណែនាំឱ្យបង្កើតក្រុមការងារឥស្សរជនឆ្នើមថ្នាក់ជាតិ មានយន្តការច្បាស់លាស់ស្របតាម រចនាសម្ព័ន្ធដែល មានស្រាប់របស់កក្រក គ្របដណ្ដប់ទូទាំងប្រទេស ជំរុញការអនុវត្តផ្ទាល់ដោយក្រុមការងារឥស្សរជនឆ្នើមថ្នាក់ជាតិទូទាំង២៥សាខារាជធានី-ខេត្ត តាមរយៈបណ្ដាញដ៏រឹងមាំរបស់អ្នកស្ម័គ្រចិត្ដ យុវជន និងមន្ត្រីសាខា-អនុសាខា។ លោកជំទាវបន្តថា ឆ្លងកាត់តាមសកម្មភាពដ៏ខ្លាំងក្លានៃការចូលរួមចំណែករបស់កាកបាទក្រហមកម្ពុជា យើងសង្កេតឃើញថា ការចម្លងមេរោគអេដស៍ពីម្តាយទៅកូនមានការធ្លាក់ចុះ, អ្នកដែលសង្ស័យថាប្រឈមនឹងមេរោគអេដស៍ បានទៅធ្វើតេស្តរកមេរោគអេដស៍ ញ៉ាំងឱ្យកម្ពុជាសម្រេចបានគោលដៅ៩៥ទី១ នាពេលនេះ ហើយអ្នកផ្ទុកមេរោគអេដស៍រស់នៅមានភាពសុខដុមរមនា មានសមាហរណកម្មល្អដោយមិនមានការរើសអើងនិងមាក់ងាយ។

នៅក្នុងឱកាសនោះដែរ មតិចូលរួមពីវាគ្មិនដទៃទៀតបានលើកសរសើរឱ្យតម្លៃខ្ពស់ដល់ កាកបាទក្រហមកម្ពុជា រួមមាន៖ ឯកឧត្តមទេសរដ្ឋមន្ត្រី អៀង មូលី បានលើកឡើងថា៖ កាកបាទក្រហមកម្ពុជា បានជួយលើការងារអេដស៍ច្រើនណាស់ ដូចនេះយើងទាំងអស់គ្នាមិនអាចមិននឹកគុណកាកបាទក្រហមកម្ពុជាបានទេ ហើយជាពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជាប្រធាន លោកបានដឹកនាំការងារនេះដោយផ្ទាល់ និងជាឥស្សរជនឆ្នើមថ្នាក់ជាតិផងដែរ។ ជាមួយគ្នានេះ​លោកជំទាវ យក់ ​សម្បត្តិ រដ្ឋលេខាធិការក្រសួងសុខាភិបាល ក៏បានលើកឡើងពីកាកបាទក្រហមកម្ពុជា មានតួនាទីសំខាន់ ជាពិសេសសំណូមពរឱ្យកាកបាទក្រហមកម្ពុជា ជួយថែមទៀតដោយជំរុញឱ្យស្ត្រីដែលមានផ្ទៃពោះ និងស្ត្រីក្នុងវ័យបន្តពូជ ទៅធ្វើតេស្តរកមេរោគអេដស៍ និងស្វាយ ដើម្បីទទួលបានការព្យាបាលទាន់ពេលវេលា កាត់បន្ថយការចម្លងមេរោគអេដស៍ពីម្តាយទៅកូន។ ទន្ទឹមនោះ លោក សឺម សុផល តំណាងអ្នកផ្ទុកមេរោគអេដស៍នៅកម្ពុជា បានលើកឡើងអំពីគុណបំណាច់ដែលសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាគំរូដែលផ្តល់ឱ្យលោកមានក្តីសង្ឃឹម បានមកដល់ថ្ងៃនេះ ដោយសារឃើញសម្តេចពក្មេងដែលរងគ្រោះដោយមេរោគអេដស៍ ដែលធ្វើឱ្យលោកមានទឹកចិត្ត ហើយក៏ជាចំណែកមួយដែលធ្វើឱ្យការរើសអើងនៅក្នុងប្រទេសកម្ពុជាមានការធ្លាក់ចុះយ៉ាងខ្លាំងផងដែរ៕

អគ្គិសនីកម្ពុជា ឧបត្ថម្ភថវិកា 180,000,000 រៀល ជូនកាកបាទក្រហមកម្ពុជា ក្នុងឱកាសខួបលើកទី១៦៣ ទិវា ៨ ឧសភា ឆ្នាំ២០២៦ ក្រោមមូលបទ «បន្តរួមកម្លាំងគ្នា ដើម្បីមនុស្សធម៌» ...!!

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សូមថ្លែងអំណរគុណយ៉ាងជ្រាលជ្រៅបំផុតចំពោះ អគ្គិសនីកម្ពុជា ដែលបានឧបត្ថម្ភថវិកា 180,000,000 រៀល (មួយរយប៉ែតសិបលានរៀល) ជូនកាកបាទក្រហមកម្ពុជា ក្នុងឱកាសខួបលើកទី១៦៣ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២៦ ក្រោមមូលបទ «បន្តរួមកម្លាំងគ្នា ដើម្បីមនុស្សធម៌»។

«ថវិកាដែលសប្បុរសជនបានបរិច្ចាគនេះ នឹងក្លាយទៅជាអង្ករ ម្ហូបអាហារ ទឹកស្អាត ថ្នាំពេទ្យ និងសម្ភារៈចាំបាច់ ឬជំនួយបន្ទាន់មួយកញ្ចប់សម្រាប់ជួយដល់គ្រួសារមួយដែលកំពុងជួបការលំបាក។ លើសពីនេះទៅទៀត វាក៏ក្លាយទៅជាកម្លាំងចិត្តមួយសម្រាប់ម្តាយម្នាក់ ដែលកំពុងបារម្ភពីកូនៗ ជាក្តីសង្ឃឹមមួយសម្រាប់គ្រួសារភៀសសឹក ជាការលួងលោម និងលើកទឹកចិត្ត សម្រាប់គ្រួសារយុទ្ធជនពលី ឬយុទ្ធជនរងរបួស និងជាសារដ៏កក់ក្ដៅមួយ ប្រាប់ពួកគាត់ថា ពួកគាត់ មិនត្រូវបានបំភ្លេចចោលឡើយ។ សប្បុរសជនមិនមែនជាអ្នកដែលនៅឆ្ងាយពីប្រតិបត្តិការមនុស្សធម៌ទេ។ សប្បុរសជនគឺជាផ្នែកមួយនៃបេសកកម្មមនុស្សធម៌នេះ ហើយជាកម្លាំងពិតនៅពីក្រោយជំនួយ ដែលទៅដល់ដៃអ្នករងគ្រោះ។»

សូមជម្រាបជូនថា សប្បុរសជនគ្រប់មជ្ឈដ្ឋាន អាចបន្តបរិច្ចាគជូនកាកបាទក្រហមកម្ពុជា តាមរយៈក្រុមការងារនៅទីស្នាក់ការកណ្តាលកាកបាទក្រហមកម្ពុជា ឬធ្វើការបរិច្ចាគតាមរយៈគណនីធនាគាររបស់កាកបាទក្រហមកម្ពុជា ដូចខាងក្រោម៖

👉 ១. ធនាគារពាណិជ្ជកម្មក្រៅប្រទេសនៃកម្ពុជា (FTB)៖
- អ្នកទទួលផល : កាកបាទក្រហមកម្ពុជា
- គណនីឈ្មោះ : CRC Internal Funds Raised
- គណនីប្រាក់រៀល : 100004348127
- គណនីប្រាក់ដុល្លារអាម៉េរិក : 300001709996

👉 ២. ធនាគារវឌ្ឍនៈអាស៊ីចំកាត់ (ABA)៖
- អ្នកទទួលផល : កាកបាទក្រហមកម្ពុជា
- គណនីឈ្មោះ : CAMBODIAN RED CROSS
- គណនីប្រាក់រៀល : 777 766 168
- គណនីប្រាក់ដុល្លារអាម៉េរិក : 777 788 168

👉 រាល់ព័ត៌មានបន្ថែម សូមមេត្តាទំនាក់ទំនង៖
- លោកជំទាវ ពុំ ចន្ទីនី 012 921 105
- លោកជំទាវ ម៉ែន នារីសោភ័គ 012 810 854
- ឯកឧត្តម ឌួង អេលីត 017 248 888

កាកបាទក្រហមកម្ពុជា ជួបសំណេះសំណាល និងផ្សព្វផ្សាយស្តីពី “សុខភាពមនុស្សចាស់” ជូនដល់លោកយាយលោកតា និងជនមានពិការភាព ៣១នាក់ នៅស្រុកស្រែអំបិល ខេត្តកោះកុង …!!

ទីស្នាក់ការកណ្តាលកាកបាទក្រហមកម្ពុជា និងសាខាកាកបាទក្រហមកម្ពុជា ខេត្តកោះកុង រួមជាមួយអនុសាខាស្រុកស្រែអំបិល នៅថ្ងៃទី១១ ខែមិថុនា ឆ្នាំ២០២៦នេះ បានរៀបចំពិធីសំណេះសំណាល និងផ្សព្វផ្សាយ ស្តីពី “សុខភាពមនុស្សចាស់” ជូនដល់លោកយាយលោកតា ជាចាស់ជរាគ្មានទីពឹងដែលមានអាយុចាប់ពី ៧០ឆ្នាំឡើងទៅ និងជនមានពិការភាពចំនួន ៣១គ្រួសារ រស់នៅឃុំជ្រោយស្វាយ ស្រុកស្រែអំបិល ខេត្តកោះកុង។ ពិធីនេះប្រព្រឹត្តទៅក្រោមវត្តមាន លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា និងឯកឧត្តមវេជ្ជបណ្ឌិត ទៅ ម៉ឹង លេខាធិការគណៈកម្មាធិការសាខាកាកបាទក្រហមកម្ពុជា ខេត្តកោះកុង និងសហការី។

ក្នុងឱកាសនោះ លោកយាយលោកតា ដែលបានចូលរួមកម្មវិធីនេះ ទទួលបានការអប់រំផ្សព្វផ្សាយពីខ្លឹមសារសំខាន់ៗនៃសៀវភៅអប់រំសុខភាពមនុស្សចាស់ ដែលបានបង្ហាញនូវវិធីសាស្ត្រចំនួន៩ ដែលជាមគ្គុទ្ទេសក៍ក្នុងការកសាងទម្លាប់រស់នៅប្រកបដោយគុណភាព ការពារជំងឺដង្កាត់ និងការឈានទៅសម្រេចបាននូវអាយុយឺនយូរ។ វិធីសាស្ត្រគន្លឹះទាំង ៩ ចំណុចនោះរួមមាន៖ ១. តុល្យភាពសមត្ថភាពការងារក្នុងដំណើរខ្សែជីវិត។ ២. ការប៉ាន់ប្រមាណអំពីសុខភាពផ្ទាល់ខ្លួន។ ៣. ការផ្លាស់ប្តូរការប្រព្រឹត្ត ។ ៤. ការការពារជំងឺមិនឆ្លង។ ៥. ការការពារការដួល។ ៦. ការការពារភាពឯកោពីសង្គម។ ៧. ការបរិភោគដើម្បីមានសុខភាពល្អ។ ៨. ការហាត់ប្រាណជាប្រចាំ និង ៩. ការរៀនអំពីវិធីធ្វើឱ្យមានអាយុវែង។

បន្ថែមលើនេះ លោកយាយលោកតា ក៏មានការយល់ដឹងអំពីការផ្លាស់ប្តូររបបអាហារូបត្ថម្ភឱ្យបានត្រឹមត្រូវស្របតាមវ័យ ដែលជាគន្លឹះដ៏សំខាន់បំផុតក្នុងការជួយឱ្យមនុស្សចាស់អាចរក្សាបាននូវសុខភាពមាំមួន បង្ការជំងឺរ៉ាំរ៉ៃ និងបង្កើនគុណភាពជីវិត ជាពិសេសត្រូវប្រកាន់ខ្ជាប់នូវពាក្យស្លោក “ទម្លាប់រស់នៅល្អ និងស្រឡាញ់ខ្លួន ត្រូវស្ងួនចំណី”។

សូមជម្រាបជូនថា បន្ថែមពីលើចំណេះដឹងខាងផ្នែកសុខភាព គ្រួសារនីមួយៗក៏ទទួលបាននូវអំណោយរបស់កាកបាទក្រហមកម្ពុជា ដែលក្នុង ១គ្រួសារៗ ទទួលបាន ៖ អង្ករ ៣០គីឡូក្រាម, មី ១កេស, ត្រីខ ១០កំប៉ុង, ទឹកស៊ីអ៉ីវ ៦ដប, ទឹកត្រី ៦ដប, ប្រេងឆា ២ដប, ឃីត (សារុង ក្រមា មុង ភួយ) ១កញ្ចប់, អង្ករសុខភាព ៥កញ្ចប់ និងថវិកា ២០.០០០រៀល៕

ស្ត្រីមានកូនតូច និងស្ត្រីមានផ្ទៃពោះ ៥២នាក់ នៅស្រុកស្រែអំបិល ខេត្តកោះកុង ទទួលបានការយល់ដឹងបន្ថែមស្តីពី “អនាម័យជាជំនាញម្ដាយ-កុមារ” …!!

នៅព្រឹកថ្ងៃទី១១ ខែមិថុនា ឆ្នាំ២០២៦នេះ លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា និងក្រុមការងារឥស្សរជនឆ្នើមថ្នាក់ជាតិ នៃទីស្នាក់ការកណ្ដាល និងសាខាកាកបាទក្រហមកម្ពុជា ខេត្តកោះកុង បានជួបសំណេះសំណាល និងអប់រំផ្សព្វផ្សាយស្តីពី “អនាម័យជាជំនាញម្ដាយ-កុមារ៖ អនាម័យក្នុងផ្ទះ សាលារៀន និងការពារជំងឺរាគ និងជំងឺពោះវៀនសម្រាប់កុមារ” ជូនដល់ស្ត្រីមានផ្ទៃពោះ និងស្ត្រីមានកូនតូចចំនួន ៥២នាក់ ដែលពិធីនេះរៀបចំឡើងនៅមណ្ឌលសុខភាព យន្តមីនជ្រោយស្វាយ ស្ថិតក្នុងភូមិស្រឡៅ ឃុំជ្រោយស្វាយ ស្រុកស្រែអំបិល ខេត្តកោះកុង។

ពិធីអប់រំផ្សព្វផ្សាយនេះ មានគោលបំណងលើកកម្ពស់ចំណេះដឹងដល់ស្ត្រីជាមាតា អាណាព្យាបាល និងសហគមន៍អំពី អនាម័យជាជំនាញរបស់ម្តាយ និងកុមារ រួមនិងការយល់ដឹងពីវិធានសំខាន់ៗក្នុងការថែទាំសុខភាពមាតា និងកុមារ ព្រោះថា សុខភាពមាតា និងកុមារ គឺជាគ្រឹះដ៏សំខាន់ក្នុងការកសាងមូលធនមនុស្សប្រកបដោយគុណភាពសម្រាប់សង្គមជាតិ។

ជាមួយគ្នានេះ ស្ត្រីជាមាតា និងអ្នកចូលរួមក្នុងពិធីនេះ បានទទួលការយល់ដឹងអំពី “សារបានក្រុមការងារឥស្សរជនឆ្នើមថ្នាក់ជាតិ” ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិនៃផែនការសកម្មភាពរួមអគ្គលេខាធិការ អង្គការសហប្រជាជាតិដើម្បីសុខភាពស្ត្រី និងកុមារ និងជាឥស្សរជនឆ្នើមថ្នាក់ជាតិនៃវេទិកាភាពជាអ្នកដឹកនាំតំបន់អាស៊ី-ប៉ាស៊ីហ្វិក ឆ្លើយតបមេរោគអេដស៍ ជំងឺអេដស៍ និងការអភិវឌ្ឍនៅកម្ពុជា។ ទន្ទឹមនឹងនេះ ក៏ទទួលបានចំណេះដឹងយ៉ាងលម្អិតអំពី “អនាម័យជាជំនាញម្ដាយ-កុមារ៖ អនាម័យក្នុងផ្ទះ សាលារៀន និងការពារជំងឺរាគ និងជំងឺពោះវៀនសម្រាប់កុមារ” តាមរយៈការអនុវត្តតាមវិធាន «រស់នៅស្អាត ៣យ៉ាង» គឺ (ហូបស្អាត ផឹកស្អាត និងរស់នៅស្អាត) ការគ្រប់គ្រងអនាម័យក្នុងផ្ទះ និងសាលារៀន ព្រមទាំងវិធីសាស្ត្រការពារកុមារតូចៗពីជំងឺរាគ គ្រុនចាញ់ គ្រុនឈាម ជំងឺគ្រុនផ្តាសាយ និងជំងឺគ្រុនពោះវៀនជាដើម ដែលជាក្តីបារម្ភទូទៅនៅក្នុងសហគមន៍។ ដោយឡែក នៅក្នុងអំឡុងពេលមានផ្ទៃពោះ ស្ត្រីជាមាតាត្រូវយកចិត្តទុកដាក់ទៅពិនិត្យផ្ទៃពោះឱ្យបានទៀងទាត់យ៉ាងតិច ៤ដង តាមការណែនាំរបស់គ្រូពេទ្យ ត្រូវទទួលទានអាហារដែលមានសារធាតុចិញ្ចឹមគ្រប់គ្រាន់ និងត្រូវសម្រាលកូននៅមណ្ឌលសុខភាព ឬមន្ទីរពេទ្យបង្អែកដើម្បីសុវត្ថិភាព។ ក្រោយពេលសម្រាល ទារកត្រូវតែទទួលបានការបំបៅដោយទឹកដោះម្តាយតែមួយមុខគត់ចាប់ពីពេលកើតភ្លាមរហូតដល់អាយុ ៦ខែ និងបន្តបំបៅរហូតដល់អាយុ ២ឆ្នាំ រួមផ្សំជាមួយអាហារបន្ថែម ព្រមទាំងនាំទារកទៅចាក់វ៉ាក់សាំងការពារជំងឺផ្សេងៗឱ្យបានគ្រប់ចំនួន។

ស្ត្រីជាមាតាទាំងអស់ ក៏ទទួលបានចំណេះដឹងអំពីវិធីសាស្ត្រការពារខ្លួនពីជំងឺឆ្លងនានា ដែលជាប្រភេទជំងឺឆ្លងរាលដាលពីមនុស្សម្នាក់ទៅមនុស្សម្នាក់ទៀត ឬពីសត្វមកមនុស្ស តាមរយៈភ្នាក់ងារចម្លងផ្សេងៗដូចជា បាក់តេរី វីរុស ប៉ារ៉ាស៊ីត និងផ្សិត មានដូចជាជំងឺអេដស៍ ជំងឺស្វាយ ជំងឺរលាកថ្លើម និងជំងឺផ្តាសាយជាដើម។ ដោយឡែកចំពោះវិធានការគន្លឹះក្នុងការទប់ស្កាត់ជំងឺមិនឆ្លងចម្បងៗរួមមាន ជំងឺលើសសម្ពាធឈាម ទឹកនោមផ្អែម ជំងឺបេះដូង និងសរសៃឈាម និងជំងឺមហារីកជាដើម ដែលទាមទារឱ្យមានការកែប្រែទម្លាប់រស់នៅជាវិជ្ជមាន ដោយការទទួលទានបន្លែផ្លែឈើ ទទួលទានស្ករតិចអំបិលតិច ខ្លាញ់តិច, ឈប់ជក់បារី, ឈប់ទទួលទានគ្រឿងស្រវឹង, ហាត់ប្រាណឱ្យបានទៀងទាត់, និងពិនិត្យសុខភាពជាប្រចាំថ្ងៃ។

ក្រោយបញ្ចប់ពិធីសំណេះសំណាល និងការផ្សព្វផ្សាយខាងលើនេះ លោកជំទាវ ម៉ែន នារីសោភ័គ បានប្រគល់ប័ណ្ណសរសើរ និងលិខិតថ្លែងអំណរគុណរបស់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនដល់ ឯកឧត្តមវេជ្ជបណ្ឌិត ទៅ ម៉ឹង ប្រធានមន្ទីរសុខាភិបាល និងជាលេខាធិការនៃគណៈកម្មាធិការសាខាកាកបាទក្រហមកម្ពុជា ខេត្តកោះកុង, លោក ជា ច័ន្ទកញ្ញា អភិបាលនៃគណៈអភិបាលស្រុក និងជាប្រធានគណៈកម្មាធិការ អនុសាខាកាកបាទក្រហមកម្ពុជា ស្រុកស្រែអំបិល និងលោក លី បូរ៉ា ប្រធានមណ្ឌលសុខភាព យន្តមីនជ្រោយស្វាយ ដែលបានចូលរួមសហការរៀបចំពិធី និងជាការលើកទឹកចិត្ត ក៏ដូចជាទទួលស្គាល់នូវកិច្ចខិតខំប្រឹងប្រែងបម្រើប្រជាពលរដ្ឋក្នុងមូលដ្ឋាន។

សូមជម្រាបដែរថា ជាការរួមចំណែកលើកកម្ពស់ជីវភាពរស់នៅ និងអាហារូបត្ថម្ភដល់ស្ត្រីមានផ្ទៃពោះ និងស្ត្រីមានកូនតូចចំនួន៥២នាក់ដែលរួមក្នុងពិធីនេះ, ក្រុមការងារឥស្សរជនឆ្នើមថ្នាក់ជាតិ បានផ្ដល់អំណោយមនុស្សធម៌ដែលក្នុងម្នាក់ៗម្នាក់ៗទទួលបាន៖ អង្ករ ១០គីឡូក្រាម, មី ១កេស, ត្រីខ ១០កំប៉ុង, កន្សែងពោះគោ ១, សារុង១, សាប៊ូដុសខ្លួន ១ដប, អង្ករសុខភាព ៥កញ្ចប់ និងថវិកា ២០.០០០រៀល៕

ថ្នាក់ដឹកនាំ មន្ត្រីរាជការ បុគ្គលិក យុវជន និងនិស្សិត នៃវិទ្យាស្ថានជាតិពាណិជ្ជសាស្ត្រ ឧបត្ថម្ភថវិកា 2,305,000 រៀល ជូនកាកបាទក្រហមកម្ពុជា ក្នុងឱកាសខួបលើកទី១៦៣ ទិវា ៨ ឧសភា ឆ្នាំ២០២៦ ក្រោមមូលបទ «បន្តរួមកម្លាំងគ្នា ដើម្បីមនុស្សធម៌» ...!!

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សូមថ្លែងអំណរគុណយ៉ាងជ្រាលជ្រៅបំផុតចំពោះ ថ្នាក់ដឹកនាំ មន្ត្រីរាជការ បុគ្គលិក យុវជន និងនិស្សិត នៃវិទ្យាស្ថានជាតិពាណិជ្ជសាស្ត្រ ដែលបានឧបត្ថម្ភថវិកា 2,305,000 រៀល ជូនកាកបាទក្រហមកម្ពុជា ក្នុងឱកាសខួបលើកទី១៦៣ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២៦ ក្រោមមូលបទ «បន្តរួមកម្លាំងគ្នា ដើម្បីមនុស្សធម៌»។

«ថវិកាដែលសប្បុរសជនបានបរិច្ចាគនេះ នឹងក្លាយទៅជាអង្ករ ម្ហូបអាហារ ទឹកស្អាត ថ្នាំពេទ្យ និងសម្ភារៈចាំបាច់ ឬជំនួយបន្ទាន់មួយកញ្ចប់សម្រាប់ជួយដល់គ្រួសារមួយដែលកំពុងជួបការលំបាក។ លើសពីនេះទៅទៀត វាក៏ក្លាយទៅជាកម្លាំងចិត្តមួយសម្រាប់ម្តាយម្នាក់ ដែលកំពុងបារម្ភពីកូនៗ ជាក្តីសង្ឃឹមមួយសម្រាប់គ្រួសារភៀសសឹក ជាការលួងលោម និងលើកទឹកចិត្ត សម្រាប់គ្រួសារយុទ្ធជនពលី ឬយុទ្ធជនរងរបួស និងជាសារដ៏កក់ក្ដៅមួយ ប្រាប់ពួកគាត់ថា ពួកគាត់ មិនត្រូវបានបំភ្លេចចោលឡើយ។ សប្បុរសជនមិនមែនជាអ្នកដែលនៅឆ្ងាយពីប្រតិបត្តិការមនុស្សធម៌ទេ។ សប្បុរសជនគឺជាផ្នែកមួយនៃបេសកកម្មមនុស្សធម៌នេះ ហើយជាកម្លាំងពិតនៅពីក្រោយជំនួយ ដែលទៅដល់ដៃអ្នករងគ្រោះ។»

សូមជម្រាបជូនថា សប្បុរសជនគ្រប់មជ្ឈដ្ឋាន អាចបន្តបរិច្ចាគជូនកាកបាទក្រហមកម្ពុជា តាមរយៈក្រុមការងារនៅទីស្នាក់ការកណ្តាលកាកបាទក្រហមកម្ពុជា ឬធ្វើការបរិច្ចាគតាមរយៈគណនីធនាគាររបស់កាកបាទក្រហមកម្ពុជា ដូចខាងក្រោម៖

👉 ១. ធនាគារពាណិជ្ជកម្មក្រៅប្រទេសនៃកម្ពុជា (FTB)៖
- អ្នកទទួលផល : កាកបាទក្រហមកម្ពុជា
- គណនីឈ្មោះ : CRC Internal Funds Raised
- គណនីប្រាក់រៀល : 100004348127
- គណនីប្រាក់ដុល្លារអាម៉េរិក : 300001709996

👉 ២. ធនាគារវឌ្ឍនៈអាស៊ីចំកាត់ (ABA)៖
- អ្នកទទួលផល : កាកបាទក្រហមកម្ពុជា
- គណនីឈ្មោះ : CAMBODIAN RED CROSS
- គណនីប្រាក់រៀល : 777 766 168
- គណនីប្រាក់ដុល្លារអាម៉េរិក : 777 788 168

👉 រាល់ព័ត៌មានបន្ថែម សូមមេត្តាទំនាក់ទំនង៖
- លោកជំទាវ ពុំ ចន្ទីនី 012 921 105
- លោកជំទាវ ម៉ែន នារីសោភ័គ 012 810 854
- ឯកឧត្តម ឌួង អេលីត 017 248 888

កម្មករ-កម្មការិនីរងរបួសធ្ងន់ក្នុងហេតុការណ៍គ្រោះថ្នាក់ចរាចរណ៍នៅខេត្តស្វាយរៀង ទទួលបានការយកចិត្តទុកដាក់ពីមាតាមនុស្សធម៌ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន...!!

មាតាមនុស្សធម៌ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅថ្ងៃសុក្រទី៥ ខែមិថុនា ឆ្នាំ២០២៦នេះ បានចាត់ក្រុមការងារនៃទីស្នាក់ការកណ្តាល ចុះសួរសុខទុក្ខ កម្មករ-កម្មការិនី រងរបួសធ្ងន់ចំនួន៧នាក់ ក្នុងហេតុការណ៍គ្រោះថ្នាក់ចរាចរណ៍ក្រឡាប់រថយន្តដឹកកម្មករនៅខេត្តស្វាយរៀង កាលពីព្រឹកថ្ងៃទី៤ ខែមិថុនាឆ្នាំ ២០២៦ កន្លងទៅ ដែលបច្ចុប្បន្នមានកម្មករ-កម្មការិនី ចំនួន៦នាក់ កំពុងសម្រាកព្យាលនៅមន្ទីរខេត្តស្វាយរៀង និងបញ្ជូនមកសម្រាកព្យាបាលនៅមន្ទីរពេទ្យកាល់ម៉ែតក្នុងរាជធានីភ្នំពេញ ចំនួន១នាក់។

សូមជម្រាបជូនថា ក្រុមការងារបានបែងចែកជាពីរគោលដៅផ្សេងគ្នា ក្នុងការចុះសួរសុខទុក្ខ និងនាំយកថវិកា ដើម្បីជួយសម្រាលការលំបាក ជូនចំពោះបងប្អូន កម្មករ-កម្មការិនីដែលរងរបួសខាងលើ ក្នុងនោះគោលដៅទី១. ដឹកនាំដោយឯកឧត្តមវេជ្ជបណ្ឌិត សុខ ឡុង នាយកនាយកដ្ឋានសុខភាព អញ្ជើញចុះសួរសុខទុក្ខអ្នករបួសដែលបញ្ជូនមកសម្រាកព្យាបាលនៅមន្ទីរពេទ្យកាល់ម៉ែត រាជធានីភ្នំពេញ។ គោលដៅទី២. ដឹកនាំដោយលោកវេជ្ជបណ្ឌិត អ៊ុយ សំអុន នាយកនាយកដ្ឋានគ្រប់គ្រងគ្រោះមហន្តរាយ រួមជាមួយថ្នាក់ដឹកនាំសាខាកាកបាទក្រហមកម្ពុជាខេត្តព្រៃវែង អញ្ជើញចុះសួរសុខកម្មករកម្មការិនីចំនួន ៦នាក់ដែលរងរបួសកំពុងសម្រាកព្យាបាលនៅមន្ទីរពេទ្យខេត្តស្វាយរៀង។

ក្នុងឱកាសសំណេះសំណាលនាពេលនោះ ក្រុមការងារ បាននាំនូវប្រសាសន៍ផ្តាំផ្ញើរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ចូលរួមសម្តែងនូវការសោកស្តាយចំពោះឧបទ្ទវហេតុដែលបានកើតឡើងចំពោះបងប្អូននាពេលនេះ និងសូមជូនពរបងប្អូនឆាប់បានជាសះស្បើយ ត្រូវស្តាប់តាមការណែនាំរបស់ក្រុមគ្រូពេទ្យ ដើម្បីអាចបន្តប្រកបរបរចិញ្ចឹមជីវិតឡើងវិញបាន។ ជាថ្មីម្តងទៀតសូមអំពាវនាវដល់ប្រជាពលរដ្ឋទាំងអស់ចូលរួមគោរពច្បាប់ចរាចរណ៍ទាំងអស់គ្នា ជាពិសេសបងប្អូនដែលជាអ្នកបើកបររថយន្តដឹកកម្មករ-កម្មការិនី ត្រូវលើកកម្ពស់ការយកចិត្តទុកដាក់គិតគូរពីសុខសុវត្ថិភាពរបស់អ្នករួមដំណើរ ព្រមទាំងចូលរួមគោរពច្បាប់ចរាចរណ៍ជាចាំបាច់។

សូមបញ្ជាក់ថា អ្នកដែលរងរបួសបញ្ជូនមកព្យាបាលនៅភ្នំពេញ ទទួលបានគ្រឿងឧបភោគបរិភោគ និងថវិកា២លានរៀល។ ដោយឡែកអ្នកដែលរងរបួសកំពុងសម្រាកព្យាបាលនៅខេត្តស្វាយរៀង ក្នុងម្នាក់ៗ ទទួលបានថវិកា២លានរៀល។ បន្ថែមលើនេះ សាខាកាកបាទក្រហមកម្ពុជា ខេត្តព្រៃវែង បានឧបត្ថម្ភអ្នករបួសក្នុងម្នាក់ៗ ថវិកា ៥០ម៉ឺនរៀល។ទន្ទឹមនេះក្រុមការងារបន្តសួរសុខទុក្ខអ្នកជំងឺវះកាត់ចំនួន ៣នាក់ និងស្ត្រីទើបសម្រាលកូននិងត្រៀមសម្រាលចំនួន១៤នាក់ នៅមន្ទីរពេទ្យខេត្តស្វាយរៀងនេះផងដែរ។

សូមរំលឹកថា មានករណីគ្រោះថ្នាក់ចរាចរណ៍ក្រឡាប់រថយន្តដឹកកម្មករសរុប ៣៧នាក់ បណ្ដាលឱ្យកម្មករកម្មការិនីរងរបួសសរុបចំនួន ២៥នាក់ស្រី ១៥នាក់ ក្នុងនោះ របួសធ្ងន់៧នាក់ នៅចំណុចខាងមុខសាលាបឋមសិក្សាម្រាក ស្ថិតនៅក្នុងភូមិម្រាក ឃុំស្វាយចេក ស្រុករំដួល ខេត្តស្វាយរៀង៕

ផ្ទះ៣ខ្នង និងអណ្តូងចំនួន៣ផ្សេងទៀត ជាព្រះរាជអំណោយដ៏ឧត្តុង្គឧត្តមរបស់ សម្តេចព្រះវររាជមាតាជាតិខ្មែរ តាមរយៈសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនប្រជានុរាស្ត្រ ៣គ្រួសារទៀត រស់នៅស្រុកបន្ទាយអំពិល ខេត្តឧត្តរមានជ័យ ...!!

បន្ទាប់ពីបានទទួលព្រះរាជទ្រព្យដ៏ឧត្តុង្គឧត្តមចំនួន ៣ម៉ឺនដុល្លារអាម៉េរិក របស់សម្តេចព្រះមហាក្សត្រី ព្រះវររាជមាតាជាតិខ្មែរ ប្រោសប្រទានជូនសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក្នុងឱកាសថ្ងៃខួបកំណើតកាលពីថ្ងៃទី១៥ ខែធ្នូ ឆ្នាំ២០២៥កន្លងទៅ, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ចែងព្រះរាជទ្រព្យដ៏ឧត្តុង្គឧត្តមនេះសាងសង់ផ្ទះចំនួន ៣ខ្នង និងអណ្តូងទឹកចំនួន ៣អណ្តូង ជូនប្រជានុរាស្ត្រងាយរងគ្រោះបំផុតចំនួន ៣គ្រួសារ រស់នៅឃុំគោកខ្ពស់ ស្រុកបន្ទាយអំពិល ខេត្តឧត្តរមានជ័យ។ ផ្ទះនិងអណ្តូងខាងលើនេះ បានសាងសង់រួចរាល់កាលពីថ្ងៃទី១ ខែមិថុនាកន្លងទៅ ហើយដែលពិធីប្រគល់-ទទួលជាផ្លូវការបានប្រព្រឹត្តទៅនៅព្រឹកថ្ងៃទី៥ ខែមិថុនា ឆ្នាំ២០២៦នេះ ក្រោមវត្តមានលោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា។

ព្រះរាជអំណោយដ៏ឧត្តុង្គឧត្តមខាងលើនេះ បានប្រគល់ជូនគ្រួសារទី១ លោកយាយ យ៉ុង យុត អាយុ ៧២ឆ្នាំ រស់នៅជាមួយកូនប្រុសឈ្មោះ កេម ចាន់ធា អាយុ ៣៤ឆ្នាំ។ គ្រួសារទី២ លោកតា យិត សុខ អាយុ ៧០ឆ្នាំ ជាជនពិការជើងម្ខាង រស់នៅជាមួយភរិយាឈ្មោះ ដួង ច័ន្ទ អាយុ ៦៤ឆ្នាំ និងចៅស្រី។ គ្រួសារទី៣ លោកតា នូ យិន អាយុ ៧២ឆ្នាំ រស់នៅជាមួយភរិយាឈ្មោះ អែម សុច អាយុ ៦៩ឆ្នាំ និងចៅស្រី។ គ្រួសារនីមួយៗទទួលបាន ផ្ទះ ១ខ្នង ដែលផ្ទះនីមួយៗមានទំហំ ៦ម៉ែត x ៧ម៉ែត សង់ពីថ្ម ដំបូលស័ង្កសី មានចង្ក្រានបាយនិងបន្ទប់ទឹកក្នុងផ្ទះ មានបំពាក់ប្រព័ន្ធសូឡាបំភ្លឺខាងក្នុងនិងខាងមុខផ្ទះ សម្ភារប្រើប្រាស់ក្នុងផ្ទះ និងសម្ភារផ្ទះបាយ ព្រមទាំងអណ្តូងស្នប់មួយ ដែលចំណាយថវិកាចំនួន ១ម៉ឺនដុល្លារអាម៉េរិក។

សូមបញ្ជាក់ជូនថា ព្រះរាជូបត្ថម្ភនូវព្រះរាជទ្រព្យដ៏ឧត្តុង្គឧត្តមរបស់ សម្តេចព្រះមហាក្សត្រី ព្រះវររាជមាតាជាតិខ្មែរ ជាទីសក្ការៈដ៏ខ្ពង់ខ្ពស់បំផុត ប្រោសប្រទានជូនសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានកសាងជាព្រះរាជសមិទ្ធផលនានាជូនដល់ប្រជានុរាស្ត្រងាយរងគ្រោះបំផុតរស់នៅទីជនបទឆ្ងាយដាច់ស្រយាល ដែលមានដូចជា៖ បានសាងសង់ផ្ទះចំនួន ៣១ខ្នង (ក្នុងនោះ ផ្ទះ ២ខ្នង នៅខេត្តព្រះវិហារ, ៧ខ្នង នៅឧត្តរមានជ័យ, ៥ខ្នង នៅកំពង់ឆ្នាំង, ៥ខ្នង នៅកំពង់ស្ពឺ, ១០ខ្នង នៅពោធិ៍សាត់, និងផ្ទះ ២ខ្នង នៅខេត្តកំពង់ធំ)។ ជាមួយគ្នានេះ បានសាងសង់អណ្តូងទឹកស្អាតចំនួន ៣៦អណ្តូង (ក្នុងនោះ អណ្តូងចំនួន៣ នៅខេត្តព្រះវិហារ, អណ្តូង១៩ នៅឧត្តរមានជ័យ, អណ្តូង៣ នៅមណ្ឌលគិរី, អណ្តូង៦ នៅកំពង់ឆ្នាំង, អណ្តូង២ នៅកំពង់ស្ពឺ, និងអណ្តូង៣ នៅខេត្តកំពង់ធំ)។ ទន្ទឹមនឹងនេះ ក៏បានសាងសង់កន្លែងលាងសម្អាតដៃចំនួន ១៣កន្លែង (ក្នុងនោះកន្លែងលាងសម្អាតដៃ ៦កន្លែងនៅខេត្តកំពង់ធំ និង ៧កន្លែង នៅខេត្តមណ្ឌលគិរី)។ បន្ថែមពីនេះ ក៏បានសាងសង់បង្គន់អនាម័យ ៤ខ្នង (មាន១៣បន្ទប់) ក្នុងនោះបង្គន់អនាម័យ ៣ខ្នង នៅខេត្តកំពង់ធំ និង ១ខ្នង នៅខេត្តមណ្ឌលគិរី ផងដែរ៕